முற்றுப்புள்ளி

மறுதலிக்கப்படா  கேள்விகள் உட்சூழ

உணர்வுகளின்  பதற்றம்

சமன்படுத்தப்படாத

விடைகளின் உந்துதலில் 

வட்டக் கயிறு இறுக்கியது 

மூச்சுக் குழாய் உடைந்து 

ஆன்மா மட்டும் தனித்துப் போனதில் 

வாழும் உயிராசை மீளவும்...

தொடர்ந்தன சொட்டு சொட்டாக 

வெப்பக் குருதித் துளிகள்....

நன்றி 

திண்ணை ....

எரிமலைகள்

தவித்தபடி தண்ணீர் கேட்டது 

தர்க்கிக்கும் மனிதர் மத்தியில் 

காலால் உதைத்துத் தள்ளப்பட்டு 

பூமிக்குள் பதுங்கியது 

உள்ளார்ந்த ரணம் 

முட்டி மோதி 

புடைத்தபடி  எழும்பியது 

சிறு குன்றாய்

மீளவும் அவமதிக்கப்பட

வளர்ச்சியின் வேகம் ௯ட்டியது

முகில்களை எட்டிப் பிடிக்கையில் 

வேறுபட்ட உணர்வுகள்  தோன்ற 

குளிர்ச்சியின் தன்மை 

உச்சியில் பரவ  

அடக்கப்பட்ட கோபத்தின் 

சாயல்கள் வெடித்துக் கிளம்பின 

செந்நிறக் குருதியாய்

போகும் வழியெலாம் 

எரித்துக் கொண்டு ...

சாம்பலாய் இருந்தன  மயானக் காடுகள் ...

நன்றி 

உயிர்மை / உயிரோசை 

அகதி

எறிதழலின் சீற்றம் 

விழிகளில் பற்றியெரிய

 ஏந்திழை ஏக்கம் 

உருகிக் கானல் நீரானது 

சுதந்திர தாகமது

பஞ்சுத் துணிக்கைகளாய் 

பறந்து திரிய .....

பறிபோனது இருப்பிடம் 

பின்பெனது தேசம் .....

அகதி வாழ்க்கை 

அநித்தியமாய் தொடர....

கடலும் கடலோடிய நாடும் 

கற்பனையாகியே போனது

கனவுகளில் கதறல்களும் 

ஓலங்களும் ....

சங்கிலியாய் துரத்த ....

ஒவ்வொரு குண்டு வெடிப்பும் 

ரத்தச் சகதியும் 

நித்ய காட்சிகளாய் .....

நாடு மீளுமாசை தொடர

நான் தேசம் வந்த போது ....

ஆரவாரமாய் வரவேற்றது 

சூனியமான என் பூமி 

சுற்றமில்லாமல் 

சொந்தமில்லாமல் ...

தனித்தொரு தீவு .... 

நன்றி 

யூத்புல் விகடன் ....

கனவுக் காலம்

நாற்திசையில் கண் சுழல

குவிக்கப்பட்ட எண்ணங்கள் 

கதைக்கக் கிளம்பின

முன்னும் பின்னும் முரண்டியபடி 

பூனையின் கால் கொண்டு பதுவிசாய் 

இடைப்பட்ட கணங்கள் 

கடிகாரத்தின் முட்களில் 

மணித்துளிக்கான அவகாசம் 

ஒன்றுள் ஒன்றாய் ஒடுங்கி 

விரிந்த பொழுதுகளில் 

வினாடிகள்  ஒவ்வொன்றிலும் 

ஓர் நம்பிக்கையின் பயணம் 

புதுப் புதுக் கனவுகளாய்....

நன்றி 

உயிரோசை ...